ಋಣದ ಗೀತೆಗಳು

ಚಿತ್ರ ಕೃಪೆ : ಅಂತರ್ಜಾಲ 

ಅವಧಿಯ ಸಂಯೋಜಕಿ ಸಂಧ್ಯಾರಾಣಿಯವರು ಬರೆದ “ನಾ ಬರೆವ ಪ್ರತಿ ಅಕ್ಷರಕ್ಕೂ ಯುಗಗಳ ಬಾಯಾರಿಕೆಯಿದೆ.” ಎಂಬ ಸಾಲು ಓದಿದಾಕ್ಷಣ ರಾಧೆ , ಮೀರೆಯರ ದಾಹ  ಮತ್ತೆ ನೆನಪಾಗಿತ್ತು .  ಬಂದೇ  ಬರುವನೆಂಬ ನಂಬಿಕೆಯೊಡನೆ ಕಾಯುವುದು ಕನಸಿನೂರಿಗೆ ದಾರಿಯಾದರೆ ಬರುವನೋ ಬಾರನೋ ಎಂಬ ಪ್ರಶ್ನೆ ಮಡುಗಟ್ಟಿದ ವಿಷಾದದ ಹೊನಲಿನಲ್ಲಿ ತೇಲಿಸುತ್ತದೆ .  ಮಡುಗಟ್ಟಿದ ವಿಷಾದ ಎಂದೊಡನೆ ನನಗೆ ನೆನಪಾಗುವುದು ಗುಲ್ಜಾರರ ಕೆಲವು ಗೀತೆಗಳು . ಅದರಲ್ಲೊಂದು “मै  एक सदी से  बैटी हूँ...”  ಹೃದಯನಾಥ್ ಮಂಗೇಶ್ಕರ್ ಸಂಗೀತ ನಿರ್ದೇಶನದಲ್ಲಿ , ಲತಾ ಮಂಗೇಶ್ಕರ್  ದನಿಯಲ್ಲಿ ಅದ್ಭುತವಾಗಿ ಮೂಡಿ ಬಂದ ಗೀತೆ . 

ಕೆಳಗಿನ ಸಾಲುಗಳು ಮೂಡಲು ಮೇಲೆ ಹೇಳಿದ ಎಲ್ಲರೂ  ಕಾರಣ .  ಆದ್ದರಿಂದ ಇದು  ಋಣದಲ್ಲರಳಿದ ಗೀತೆ

ಈ ಹಾದಿಯಲ್ಲಿ ಕಾದಿರುವೆ

ಕಾಲದ ಪರಿವೆ ಇಲ್ಲದೇ

ಮಣ್ಣ ಮೇಲೆ ಹೆಜ್ಜೆ ಮೂಡಲಿಲ್ಲ

ಆಳದ ಸುಳಿಗೆ ಯಾರೂ ಇಳಿಯಲಿಲ್ಲ

ಮುಚ್ಚಿದ ಕಣ್ಣ ಮುಂದೆ ತೇಲಿದವು 

ಒಂದಷ್ಟು ಚಂದಿರನ ರಥಗಳು 

ಆದರೆ , ಒಳಗಣ  ಚಂದಿರ

ಅಂಗಳಕ್ಕಿಳಿಯಲಿಲ್ಲ

ಆಳದ ಸುಳಿಗೆ ಯಾರೂ ಇಳಿಯಲಿಲ್ಲ

ಮರಳಿನಂತೆ ಹಾರುತ್ತಿವೆ  

ಹಗಲು ರಾತ್ರಿಗಳು

ಅಂಗಳದ ರಂಗವಲ್ಲಿಯ ಹಿಂದಿನ

ನೆರಳನು  ಯಾರೂ ಹಿಡಿಯಲಿಲ್ಲ

ಆಳದ ಸುಳಿಗೆ ಯಾರೂ ಇಳಿಯಲಿಲ್ಲ

ಎಲ್ಲ ಜೋಳಿಗೆಗಳಲಿ

ಒಂದಷ್ಟ ತುಂಬುತ್ತಾನೆ ಆಕಾಶಜ್ಜ

ನಾ ರೆಪ್ಪೆ ತಿಕ್ಕಿ , ಹಿಂಡಿ ಹರವಿದರೂ

ಹನಿಯೊಂದು ಉದುರಲಿಲ್ಲ

ಆಳದ ಸುಳಿಗೆ ಯಾರೂ ಇಳಿಯಲಿಲ್ಲ

ಚಿತ್ರ ಕೃಪೆ : ಅಂತರ್ಜಾಲ 

ಅಡಿಗರ “ಶ್ರೀ ರಾಮ ನವಮಿಯ ದಿವಸ” ಎಂಬ ಕವಿತೆಯನ್ನು  ಅಲ್ಲಲ್ಲಿ ಕೇಳಿದ್ದರೂ ವಿವರಣೆಯೊಂದಿಗೆ ಓದಿದ್ದು ಇತ್ತೀಚಿಗೆ.

ರೋಹಿತ್ ಚಕ್ರತೀರ್ಥ ನಿಲುಮೆ ಎಂಬ ತಾಣದಲ್ಲಿ ಇದರ ಬಗ್ಗೆ ಬರೆದಿದ್ದರು .

ಓದಿದ ನಂತರ ಮೂಡಿದ ಸಾಲುಗಳು ಕೆಳಗಿವೆ :

ರೇಡಿಯೋದಲ್ಲಿ  ‘ರಾಮನ ಅವತಾರ..’ ಕೇಳುವುದರೊಂದಿಗೆ

ಹುಟ್ಟಿದ ಬೆಳಗು . “ಕೋಸುಂಬರಿ , ಕರಬೂಜ ದೇಹಕ್ಕೆ ಲೇಸು”

ಯೋಗ ಗುರು. ಮರೆತ ರಾಮನ ತೊಟ್ಟಿಲು ಇಂದು ಮತ್ತೆ

ದೇವರ ಮುಂದೆ. ಬೆಂದ ಊರಿನ ಬೀದಿ ಬೀದಿಯಲ್ಲಿ ಎದ್ದ

ಪಾನಕದ ಶಾಮಿಯಾನ. ಮೊಳ ಮಲ್ಲಿಗೆಯ ನಡುವೆ ನಕ್ಕ

ಸೀತಾರಾಮ . “ಸಧ್ಯ  ಕೃಷ್ಣನಂತೆ ಇವನು ಮಧ್ಯ ರಾತ್ರಿ

ಹುಟ್ಟಲಿಲ್ಲ “ ಮಗನ ಉವಾಚ . “ಅದೇನು ರಾಮನಿನ್ನೂ

ಎಳೆ ಮಗುವೇ? ವರುಷ ವರುಷವೂ ಎಂತಕ್ಕೆ ತೊಟ್ಟಿಲು

ಅವನಿಗೆ ?”  ಮಗಳ ಪ್ರಶ್ನೆ .  ದಶರಥನ ಪುತ್ರಕಾಮೇಷ್ಟಿಗೆ

ಕೊನೆ ಎಲ್ಲಿ  ? ಕೈಕೇಯಿ ಇಲ್ಲದೆಯೂ ಕಾಡು ಪಾಲಾದ ರಾಮ

ವನವಾಸಕ್ಕಿಲ್ಲಿ ಕೊನೆ ಇಲ್ಲ . ಅಗಸನಿಲ್ಲದ ಅನುಮಾನಕ್ಕೆ ನೂರು

ಹೆಸರು , ಕಾಯುವ ಕೈಗೆ ಹುತ್ತ ಕಟ್ಟಿ ಕಾಲವಾಯಿತು . ವರುಷಕ್ಕೊಮ್ಮೆ

ನೆನಪಾದರೆ , ಪುರುಸೊತ್ತಿದ್ದರೆ  ‘ರಾಮ ಲಾಲಿ ...’ ; ಅಲ್ಲಲ್ಲಿ ಮಿಡಿವ ವೀಣೆ

ಉಳಿದಂತೆ ಖಾಲಿ ಕೈಯ್ಯ ಕೋದಂಡಪಾಣಿ ಸದಾ ತೊಟ್ಟಿಲಲ್ಲಿ !