ನೋವು - ಹುತ್ತ

ನೋವಿನಲ್ಲಿದ್ದವರಿಗೆ ತಿಳುವಳಿಕೆಯನ್ನೆಲ್ಲಾ ಪಣಕ್ಕಿಟ್ಟು ಸಲಹೆ ಕೊಡಬೇಡಿ . ಅಸಹಾಕತೆ ಸಿಟ್ಟಿನ ತುತ್ತ ತುದಿಯನು ತಲುಪಿಸಿರುತ್ತದೆ. ಅಲ್ಲಿ ಮಂಡಿಯೂರಿ ಕಂಬನಿಯಲ್ಲಿ ಮೀಯುತ್ತಿರುವರಿಗೆ ಸಂಪೂರ್ಣ ಕಿವುಡು. ಇತ್ತೀಚಿಗೆ ಇದನ್ನು ಓದಿದ್ದು ಭಾರತಿ ಬಿ.ವಿ ಬರೆದ ಸಾಸಿವೆ ತಂದವಳು.. ದಲ್ಲಿ . ಅನುಭವವಾಗಿದ್ದು ಇತ್ತೀಚಿಗೆ .

ಮಂಡಿಯೂರಿ 'ಅಮ್ಮಾ....'

ಎಂದೆ , 'ಎದುರಿನವರು

ಎಲ್ಲ ಸರಿಹೋಗತ್ತೆ ಬಿಡು'

ಎನ್ನುವರೆಂದು ಕಾದೆ

'ಈ ವಯಸಿಗೆ ನೋವೇ ? ,

ತೂಕ ಕಡಿಮೆ ಮಾಡಿ ,

ಎಣ್ಣೆ ಬಿಟ್ಟು ಬಿಡಿ ,

ಬೆಣ್ಣೆಯ ಕಡೆ ನೋಡ ಬೇಡಿ '

ಮುಂದಿನ ಮಾತುಗಳು ಕೇಳಲಿಲ್ಲ

ಮಾಡಿದ ತಪ್ಪಿಗೀಗ ಅನುಭವಿಸು

ಎಂಬಂತ ನೋಟ ಇರಿಯಿತು

ಕಟ್ಟಿದ್ದ ಕಟ್ಟೆ ಒಡೆಯಿತು

ಹರಿದ ನೀರು ನೋವ ನೀಗಲಿಲ್ಲ

ನೋವಿನ ಕಾರಣ ಅವರಿಗೆ ತಿಳಿಯಲಿಲ್ಲ

ವಯಸ್ಸೇ ಕೇಳಿ ಬರದು

ಇನ್ನು ನೋವಿಗೆ ಅನುಮತಿಯೇ ?

ತಪಸ್ಸಿನ ಫಲವೇ ತೂಕ ?

ಎಣ್ಣೆಯಲ್ಲೇನು ಈಜಬಹುದೇ ?

ನೋವಿಗೆ ಬೇಕಿದ್ದದ್ದು ಒಂದಷ್ಟು ಮುಲಾಮು ,

ಬಂದ ನೋವಿಗೆ ಹೋಗುವ ದಾರಿಯೂ ಗೊತ್ತು

ಎಂಬ ಭರವಸೆ .

ತನ್ನದಲ್ಲದ ನೋವಿಗೆ ನಾಲಿಗೆಯನುಳಿದು

ಎಲ್ಲ ಇಂದ್ರಿಯಗಳು ಕಿವುಡು

ಜಗಕೆ ಕವಿದಿದೆ ಎಂಥದೋ ಕುರುಡು .

ಹತ್ತರ ಹುತ್ತದ ನಡುವೆನಿಂತು : ಬ್ಲಾಗ್ ಬರೆಯಲು ಆರಂಭಿಸಿ ಹತ್ತು ಬಾರಿ ವರುಷಗಳು ಬದಲಾಗಿವೆ . ಕುಂಟುತ್ತಾ , ಎಡುವುತ್ತಾ , ತೆವಳುತ್ತಾ ಇಲ್ಲಿಗೆ ಬಂದು ನಿಂತಿದೆ . ನಾನು ಬ್ಲಾಗ್ ಓದಿ ಎಂದು ಹೇಳಿದ್ದು ಅತೀ ಕಡಿಮೆ ಜನಕ್ಕೆ .

ಇಲ್ಲಿಗೆ ಬಂದು ಓದಿದವರ ಸಂಖ್ಯೆ ೧೦ ಸಾವಿರ ಮೇಲೊಂದಷ್ಟು.

ತಪ್ಪದೇ ಓದಿ ಪ್ರತಿಕ್ರಯಿಸುವ ಹಿರಿಯರಾದ ಸುನಾತ್ ಕಾಕಾ , ಎಷ್ಟು ದಿನವಾಯ್ತು ಬ್ಲಾಗ್ ಕಡೆ ಬಂದು ಎಂದು ನೆನಪಿಸುವ ಬದರಿ ಸರ್ ಮತ್ತು ಪ್ರೋತ್ಸಾಹಿಸಿದ ಎಲ್ಲರಿಗೂ ಅಭಾರಿ.

ಚಿತ್ತ ಹುತ್ತ ಕಟ್ಟಿದರೆ

ಹುಟ್ಟುವುದೊಂದು ಮಹಾಕಾವ್ಯ

ಹುತ್ತದ ಹಾವು ಮಲಗಿ

ಮೇಲೇರಿ ಹೂವಾದೊಡೆ

ಬದುಕಿನ ಕಾವ್ಯ ಸುಶ್ರಾವ್ಯ .