ಹಳ್ಳ ಸೇರದ ಹನಿಗಳು....ಭಾವಬನಿಗಳು - ೬

೧. ಬೋನ್ಸಾಯ್ ಗಿಡಗಳನ್ನು ಕಂಡಾಗ ಕಾಣುವುದು ನನಗೆ
ಕಲೆಯೊಂದಿಗೆ ಕುಂಟಿತಗೊಂಡ ಹಸಿರಿನ ಬೆಳವಣಿಗೆ !


೨. ನಿನ್ನ ಪಾದದಡಿಯ ಮಣ್ಣ ಕಣದಲ್ಲಿ
ಒಳಗಣ್ಣನಿಟ್ಟಿದ್ದೆ
ಯುಗದ ದೈವ ಕಲ್ಲೆಂದು
ಮರೆತೇ ಬಿಟ್ಟಿದ್ದೆ !

೩. ಹೆಜ್ಜೆಗಳನೆಲ್ಲ
ನಿನ್ನಂಗಳದಲ್ಲಿ  ಬಿಟ್ಟು
ಸವೆಯದ ದಾರಿಯಲಿ
ಹೊರಟೆ ನಾ
ನನ್ನೊಳಗನ್ನ ನಿನ್ನ ಬಾಗಿಲ ತೋರಣವಾಗಿಸಿ 
ನಿರ್ಜೀವ ದೇಹ  ಹೊತ್ತು ಹೊರಟೆ ನಾ 


೪. ಹಿಂದಿನವರು ಬರೆದದ್ದನ್ನೆ ಇಂದಿನವರು ಹೊಸ ಶೈಲಿಯಲ್ಲಿ ಬರೆಯುವುದು
ಇರುವ ಬುವಿಯನ್ನೇ ಹವಣಾಗಿಸಬೇಕೆ ಹೊರತು ಹೊಸ ನೆಲದ ಸೃಷ್ಟಿ ಸಾಧ್ಯವಿಲ್ಲವಲ್ಲ ?

೫. ಬಾಲ್ಯ ಚೆನ್ನಾಗಿತ್ತು
ಚುಕ್ಕಿ ತಾರೆ ಕೈಗೆ ಸಿಗುತಿತ್ತು
ಆಕಾಶಕ್ಕೆ ಮೆಟ್ಟಿಲು ಕಟ್ಟಬಹುದಿತ್ತು
ಈಗ ಚುಕ್ಕಿ ತಾರೆ ಎಂದರೆ  ವಿಜ್ಞಾನ
ಆಕಾಶದ ತುಂಬೆಲ್ಲಾ ನಮ್ಮದೇ ಉಪಗ್ರಹಗಳು !

 ೬. ನನ್ನೆಲ್ಲ ಕನಸುಗಳ
ನಿರ್ದಯವಾಗಿ ಕೊಂದ
ನೀನೊಬ್ಬ ಕೊಲೆಗಾರ
ಆದರೆ,
ಹೋದ ದಾರಿಗೆ ಕಂಬನಿಯ
ರಂಗವಲ್ಲಿಯನಿಡುವ 
ಶಿಕ್ಷೆ ಮಾತ್ರ ಮತ್ತೆ ನನಗೆ


೭. ಬಜಾರಿನಲ್ಲಿ ತಂದು ನಿಲ್ಲಿಸಿದವ : ತಲೆಹಿಡುಕ
ಆನಂದ (?) ಪಟ್ಟವ  : ರಸಿಕ
ಪಶ್ಚ್ಚಾತ್ತಾಪಕ್ಕಾಗಿಬರೆದು ಗಳಿಸಿದವ : ಲೇಖಕ
ಇವರಾರಿಗೂ ಕಾಣದ್ದು :  ನನ್ನ ಅಂತರಂಗ


೮. ನನ್ನ ಪಾಲಿನ ಪ್ರಳಯವಾಗಲೇ
ಆಗಿ ಹೋಗಿದೆ
ನೀನು ನಾನು ದೂರಾದ ಮೇಲೆ
ಪ್ರಳಯಕ್ಕಾಗಿ ಕಾಯುವುದರಲ್ಲಿ
ಅರ್ಥವೇನಿದೆ ?


೯. ಉತ್ಕಟವಾಗಿ ಪ್ರೇಮಿಸಬೇಕು
ಒಂದೋ ಪ್ರೇಮದಲ್ಲೊಂದಾಗಬಹುದು
ಇಲ್ಲ ಕೆಲ ಕವಿತೆಗಳು  ಕಾಲಿಗೆ ತೊಡರಬಹುದು


೧೦. ನಾ ಬರೆದ ಕವಿತೆಗಳೆಲ್ಲ ಮೊನ್ನೆ ಕಳೆದುಹೋದವು
     ಇದು ಅವುಗಳ ಫಿರ್ಯಾದು !