ಏನೆಂದು ಹಾಡಲಿ ?

ಚಿತ್ರಕೃಪೆ : ಅಂತರ್ಜಾಲ

 
ಇಂದು ಬಲು ಸುಂದರವಾದ  ಒಂದು ಕವಿತೆ ಓದಿದೆ.
ಮತ್ತೆ ಹುಟ್ಟು ಹಿಡಿದು ಹಾಯಿದೋಣಿ ಏರಿದೆ
ಹೂವು, ದುಂಬಿ, ಅವನು, ನಾನು
ಇವನ್ನು  ಮೀರಿದ ಜಗತ್ತಿಲ್ಲವೇನು ?

ಆಗುಹೋಗು, ನಿತ್ಯದ ಕಾಯಕಗಳ
ಹಿಡಿದು ಅಕ್ಕರಗಳಲಿ ಬಂಧಿಸುವ ಕಲೆ ಒಲಿದಿಲ್ಲ
ಕಂಬನಿಯ ಆಳಕ್ಕಿಳಿದು, ಮೌನ ಮುರಿದು
ನೋಡಿದರೆ  ನನ್ನ ಸರಕೆಲ್ಲ   ಬರಿದು

 ಇತಿಹಾಸ, ಪುರಾಣಗಳನೆಲ್ಲ ಜಾಲಾಡಿ
ಅರ್ಥೈಸಿ ಉಸುರುವಷ್ಟು ಜ್ಞಾನ ಲಬ್ಧವಿಲ್ಲ
ಜಗಹೃದಯನನ್ನ ಧ್ಯಾನಿಸಿ , ಒಲಿಸಲು
ಇನ್ನೆಷ್ಟಾಯು  ಬೇಕು  ಅಷ್ಟು ಮಾಡಲು  ?

ಕಂಬಗಳ ಮಧ್ಯದ ದಾರದ ಮೇಲೆ
ದೊಂಬರ  ಹುಡುಗಿಯ ಯಾಂತ್ರಿಕ  ನಡೆ 
ತಾನು ಬೀಳದಂತೆ , ಆಯ  ತಪ್ಪದಂತೆ
ನಡೆವ ಕಸರತ್ತು, ಬರೆಯಲಿನ್ನೇನುಳಿಯಿತು ?