ಹೆಣ್ಣಾಗಬೇಕಿದೆ ತಾಯಿ

ಸುಟ್ಟ ರೊಟ್ಟಿಗೆ 
ಕೆಟ್ಟ ಪಲ್ಯಕ್ಕೆ
ನಿತ್ಯವೂ ಜಗಳ
ಅಮ್ಮ ಕೇಳುತ್ತಿದ್ದಳು  ನೀನು ನಿಜಕ್ಕೂ ಮಗಳಾ  ?
ಅವಳಕಟ್ಟ ಕಡೆಯ ಮಾತು,
"ನೀನೂ  ತಾಯಾಗು ಆಗ ನಿನಗೆ ತಿಳಿದೀತು"


ಹರೆಯದ ಕುಂಚ
ಸ್ವಪ್ನ  ಪ್ರಪಂಚ
ಕ್ಷಣಕ್ಕೊಂದು ಬಣ್ಣ
ಸಂಜೆಯಾದರೆ ಅಮ್ಮ ಬಾಗಿಲೆಡೆಗೇ  ನೆಟ್ಟಿರುತ್ತಿದ್ದಳು ಕಣ್ಣ
ಕುಂಚ ಹಿಡಿಯದ ಅಮ್ಮನ ಚಿತ್ರ
ಹರೆಯದೊಡನೆ ಓಡುತ್ತಿದ್ದ  ಮಗಳೆಂಬ ಪಾತ್ರ


ಮನೆ ಬೇರೆ
ಜನ ಬೇರೆ
ಎಲ್ಲ ಹೊಸದು
ಅಮ್ಮನೊಂದಿಗಿನ  ಜಗಳವಿಲ್ಲ, ಹೊತ್ತೇ ಹೋಗದು
ಜಗ ಕಾಣದ ಅಮ್ಮನ  ತಂತ್ರ
ಸತ್ಯ ಗೆಲ್ಲುವುದೆಂಬ ನಂಬಿಕೆಯ  ಮಂತ್ರ


ಒಡಲಾಳದ ಚೂರು  ಈ  ಜೀವ
 ಹೊರ ಬಂತು, ಬಿರಿದು  ನೋವ
ಅದೇ ರೊಟ್ಟಿ, ಪಲ್ಯ
ಮಗು ಕೇಳತ್ತೆ , "ನಿಂಗೆ ಬೇರೆಂತೂ ಮಾಡಕ್ಕೆ ಬರಲ್ಯಾ ?"
ಇಂದು ಕೇಳಿತು ಅಮ್ಮನ ದನಿ
ಅಮ್ಮನೆಂಬ 'ದೈವ'   ಯಾವತ್ತಿಗೂ ಮೌನಿ


ಆದರೆ, ದೈವದ ಪಟ್ಟ  ಬೇಡ 'ನನ'ಗೆ
'ನನ್ನ' ಕೊಂದು ಬಾಳಲಾರೆ ಕೊನೆಗೆ
ಕನಸಿಗೆ ಬಣ್ಣ ತುಂಬಬಲ್ಲೆ
ಮನಸಿನ ಹಣತೆ ಹಚ್ಚ ಬಲ್ಲೆ 
'ತಾಯಾ'ಗಿಯೂ 'ಹೆಣ್ಣಾ'ಗ  ಬೇಕಿದೆ  ನಾ
ಕುಂತಿ, ಸೀತೆಯರ ದಾರಿ ಹುಡುಕ ಬೇಕಿದೆ ನಾ