ಮಲಗೆದ್ದವಳು

ಚಿತ್ರಕೃಪೆ : http://www.cianellistudios.com/abstract_paintings.html

ಇತ್ತೀಚಿಗೆ  ಸಲ್ಲಾಪದ ಸುನಾಥ್ ಕಾಕ ಯೇಟ್ಸ್ ಕವಿಯ ಕವಿತೆಯೊಂದರ ಮೂರು ಅನುವಾದಗಳ ಬಗ್ಗೆ ಬರೆದಿದ್ದರು. ಯೇಟ್ಸ್ ನನ್ನು ಅನುವಾದಿಸುವ  ದುಸ್ಸಾಹಸಕ್ಕೆ ನಾನು ಕೈ ಹಾಕಲಾರೆ. ಕೆಳಗಿರುವ  ಆ ಕವಿತೆಯ ಸಾಲು ನನಗೆ  ಬಹಳ ಇಷ್ಟ ಆಯಿತು.

For nothing can be sole or whole

That has not been rent
ಸಾಲಿನ ಮತ್ತು ಬರಹದ ಪ್ರಭಾವದಿಂದ ಕೆಳಗಿನ ಸಾಲುಗಳು ಮೂಡಿದವು . 

ಅಸಂಖ್ಯಾತ ರಾತ್ರಿಗಳನ್ನು ನಿದ್ದೆ ಇಲ್ಲದೆ
ಹಲವು ತೆಕ್ಕೆಗಳಲಿ ಕಳೆದ
ಅವಳಿಗೆ ರೆಪ್ಪೆಗಳ ಜೋಡಿಸುವುದು ಮರೆತು ಹೋಗಿದೆ
ಜೋಲುವ ಮೊಲೆಗಳು , ಗುಳಿಬಿದ್ದ ಕಂಗಳಲಿ
ದೇಹ ಸೌಂದರ್ಯ ಹೂತು ಹೋಗಿ ಬಹುಕಾಲವಾಗಿದೆ
ನಿದ್ರಿಸದ ಅವಳಿನ್ನು ಹೆಚ್ಚು ಕಾಲ ಬಾಳಳೆಂದು
ಊರಿಗೂರೇ  ಪಿಸುಗುಡುತ್ತಿದೆ
ಅಸಲಿಗೆ,  ಬಾಳುವವರು ನಿದ್ರಿಸುವರೇ ಅಲ್ಲವೇ ?

ಮೊನ್ನೆ ಒಂದು ದಿನ ಮಠದ ಗುರುಗಳು
ಶಾಂತ ಸರೋವರದ ಸೋಪಾನದ ಮೇಲೆಅವಳನ್ನು  ಭೇಟಿಯಾದರಂತೆ
"ಇನ್ನೆಷ್ಟು ದಿನ ಈ ಬದುಕು , ಈಗಲಾದರೂ ಅವನ ಸೇವೆಗೆ ಬಾ "  ಎಂದರಂತೆ
"ಇಷ್ಟು ದಿನ ಅವನಿಟ್ಟಂತೆ ಇದ್ದು ಅವನನ್ನು ಸೇವಿಸಲಿಲ್ಲವೇ ನಾನು ,
ನನಗೆ ನಿದ್ರಿಸುವ ಪರಿಯ ಕಲಿಸುವಿರೇನು ?" ಅವಳು ನಕ್ಕು ನುಡಿದಳಂತೆ
ಅಸಲಿಗೆ,  ರೆಪ್ಪೆ ಮುಚ್ಚದ ಮಾತ್ರಕ್ಕೆ  ಎಚ್ಚರವೇ ?

 ಗುರುಗಳು ಮೌನದಲ್ಲಿ ಸೋಪಾನಗಳನಿಳಿದರಂತೆ
  ಶುಧ್ಧರಾಗಿ  ಸೋಪಾನಗಳನೇರಿ ಬಂದು ಇಂತೆಂದರಂತೆ
"ಮಗಳೇ , ಎಚ್ಚರಗೊಂಡ  ನೀನು ಮತ್ತೆ ನಿದ್ರೆಯ ಬಯಸದಿರು
ಉಸಿರವನದೆ ಎಂಬುದರಿವಾದ ಬಳಿಕ ನಿದ್ರಿಸದಿರು "
ಸೋತ ಕಾಲನ್ನು ಎಳೆಯುತ್ತಾ ನಿಧಾನವಾಗಿ ಸೋಪಾನಗಳನೇರಿ
ಬಯಲ ಸೇರಿದ ಅವಳು
ಅಂದು ರಾತ್ರಿ ಹಾಯಾಗಿ ರೆಪ್ಪೆ ಮುಚ್ಚಿದವಳು ಮತ್ತೆ ಏಳಲಿಲ್ಲ
ಅಸಲಿಗೆ, ಎಚ್ಚರಗೊಂಡವರಿಗೆ ಲೋಕದ ಹಂಗೇಕೆ ?

ಇದನ್ನ ಬರೆಯೋವಾಗ ಹಿಂದಿಂದ   ಹಿಂದೋಳದಲ್ಲಿ  ಬಾಲಮುರಳಿಯವರ  'ನೀರಜಾಕ್ಷಿ   ಕಾಮಾಕ್ಷಿ....' ತೇಲಿಬರುತ್ತಿತ್ತು . ಹಾಡನ್ನ ಇಲ್ಲಿ ಕೇಳಬಹುದು 'http://mio.to/#/album/10-Classical_Carnatic_Vocal/23426- Dikshitar_Krithis_2/'