ಸೋಹಂಸೋ

 

ಚಿತ್ರಕೃಪೆ :ಅಂತರ್ಜಾಲ

ಕನಕದಾಸರು ಪ್ರಾಸಗಳನ್ನು ಬಳಸುವ ರೀತಿ ನನಗೆ ಬಹು ಇಷ್ಟ. ಈಶ ನಿನ್ನ ಚರಣ ಭಜನೆ..ಬರೆದ ಅವರ ಕೈ ಹಿಡಿದು ‘ಎನಜ್ಜಾ ಎಲ್ಲಿಂದ ಕಲಿತಿ ಈ ಜಾದೂ ‘ ಎಂದು ಕೇಳಬೇಕೆನ್ನುವ  ಹುಚ್ಚು ಐಡಿಯಾ ನನಗೆ ಆಗೀಗ ಬರುವುದಿದೆ.   ಕೆಲ ದಿನಗಳಿಂದ ಅವರ

 “ಇಷ್ಟುದಿನ ಈ ವೈಕುಂಠ
ಎಷ್ಟು ದೂರವೋ ಎನ್ನುತಲಿದ್ದೆ
ದೃಷ್ಟಿಯಿಂದಲಿ ನಾನು ಕಂಡೆ
ಸೃಷ್ಟಿಗೀಶನೆ ಶ್ರೀ ರಂಗ ಶಾಯಿ “

ಅನ್ನೋ ಪದ ತುಂಬಾ ಕಾಡುತಿತ್ತು.

ವಿದ್ಯಾ ಭೂಷರ ಧ್ವನಿಯಲ್ಲಿ ಹಾಡನ್ನು ಇಲ್ಲಿ ಕೇಳಬಹುದು  http://www.youtube.com/watch?v=To9TfXApjn8

ಕನಕರ ಪದದೊಡನೆ ನೆನಪಾಗುತ್ತಿದ್ದ  ತೆಲುಗಿನ ಸಾಲು 'ಅನ್ನಿ  ನೀವನಚು ಅಂತರಂಗಮುನ ತಿನ್ನಗಾ ವೆದಕಿ ತೆಲಿಸಿಕೊಂಟಿನಯ್ಯ...'  ತ್ಯಾಗರಾಜರ ಸುಪ್ರಸಿಧ್ಧ ಕೃತಿ ‘ಮರುಗೇಲರ ಓ ರಾಘವ’ ದಲ್ಲಿನ ಸಾಲು. ಭಾಷೆ ಬೇರೆ ಭಾವ ಒಂದೇ. 

 ಸಪ್ತಪದಿ ಚಿತ್ರದಲ್ಲಿ ಬಳಕೆಯಾದ ಹಾಡನ್ನು ಇಲ್ಲಿ ಕೇಳುತ್ತಾ ನೋಡಬಹುದು  http://www.youtube.com/watch?v=CX4kT967Fbo

ಹೌದಲ್ಲವೇ ? ನಿಜವಾದ ಹುಡುಕಾಟ ನಡೆಯಬೇಕಾದ್ದು  ಅಂತರಂಗದಲ್ಲಿ .

ಫೇಸ್ ಬುಕ್ಕಿನಲ್ಲಿ,  ಮೇಲ್ ಅಕೌಂಟು , ಫೇಸ್ ಬುಕ್ ಅಕೌಂಟು  ಇಲ್ಲದ ಗೃಹಿಣಿಯೊಬ್ಬಳು ಹಾಡುಗಾರ್ತಿಯಾಗಿ ಪ್ರಸಿಧ್ಧಳಾಗುತ್ತಿರುವ ವಿಚಾರ ಬಂದಿತ್ತು . ಆ ಹಾಡು ಚಮಯಂ  ಚಿತ್ರದ  ‘ರಾಜಹಂಸಮೆ..’

ಹಾಡು  ಕೇಳಿ  ಮಲೆಯಾಳದ ಒಂದು ಪದವೂ ಅರ್ಥವಾಗದಿದ್ದರೂ  ಕೆಳಗಿನ ಸಾಲುಗಳು ಮೂಡಿದವು .

ಹಾಡನ್ನು ಇಲ್ಲಿ http://www.youtube.com/watch?v=tlDBc9DaYxE ಕೇಳುತ್ತಾ ನೋಡಬಹುದು.

ಹಾರಲಾಗದ ರಾಜಹಂಸವೇ
ಒಂದು ಮನವಿ  ಕೇಳು ,
ನನ್ನ ಹಾಡಿನ  ದನಿ,
ಅಂಗೈಯ ಹೃದಯ ರೇಖೆ ,
ಆತ್ಮರಾಗದ ಕೇಳುಗ
ಅವನೆಲ್ಲಿ ಹೇಳು !

ಆಲಿಸುವುದ ಮರೆತು ಬರೀ ಮೊರೆವ
ಕಡಲೇ ಕೊಂಚ ಕೇಳು
ಕ್ಷಣಕ್ಕೊಂದು ಸುತ್ತು ತೇಯುತ್ತಾ  ಗಂಧವಾಗುತ್ತಿದ್ದೇನೆ
ಹಾದಿ ಅವನದೇ ಆಗಿರಲಿ
ಉರಿದುರಿದು  ಕಪ್ಪುರವಾಗಿ ಕರಗುತ್ತಿದ್ದೇನೆ
ಗುಡಿಯ ದೈವ ಅವನೇ ಆಗಿರಲಿ 

ಬಾಗಲಾರದ ಮುಗಿಲೇ
ತುಸು ಕೇಳು
ತಾರೆಗಳೆಲ್ಲಾ ಅವನ ನಗೆಯಾಗಿ
ಮೋಡಗಳೆಲ್ಲಾ ಅವನ ಹೆಜ್ಜೆಗಳಾಗಿ
ತೋರುತ್ತಿವೆ ಎನಗೆ
ರಾತ್ರಿ ಮುಗಿಯದಿರಲಿ 

ಕಾಣದೂರಿನ ಕಿವುಡು ದೈವವೇ
ಪ್ರಾರ್ಥನೆಯಲ್ಲವಿದು
ಆದರೂ ಕೇಳು
ಗಾಳಿ ಅವನುಸಿರು
ಮಳೆಯವನ ದನಿ
ಚಿಟ್ಟೆಯವನ ಚಿತ್ರ
ಹಸಿರವನ ತೋಳು
ಹೊಳೆಯವನ ಬೊಗಸೆ
ಸಾಕಿಷ್ಟು ನನಗೆ
ಉಳಿದದ್ದೆಲ್ಲಾ ನಿನಗೇ !

ಈ ಪೋಸ್ಟಿನ ಶೀರ್ಷಿಕೆ  ಮೂಗಿಗಿಂತ ಮೂಗೂತಿ ಭಾರ ಎನ್ನುವಂತಿದೆ ಆದರೂ ಬೇರಾವ  ಶೀರ್ಷಿಕೆಯೂ ಹೊಳೆಯದ ಕಾರಣ ಭಾರದ ಮೂಗುತಿಯನ್ನೆ ಇಟ್ಟಿದ್ದೇನೆ!