ಪ್ರಶ್ನೆಗಳ ಗೂಡು

ಆಕಾಶ ಮತ್ತು ಸಮುದ್ರ, ನದಿ, ಕೆರೆಗಳಿಗೆ  ಸಂತೋಷ ಮತ್ತು ದುಃಖ ಎರಡಕ್ಕೂ
ಸಲ್ಲುವ ಗುಣಗಳಿವೆ. ಅವನ ನಗೆಯನ್ನ ನೆನಪಿಸುತಿದ್ದ ಕೆರೆ , ಅದರ ಸುತ್ತಲಿನ ಹಸಿರು, ಅಲ್ಲಿ ಬರುವ ಗೋಪಾಲರು ,
ಬೆಳೆದಿದ್ದ ಥರಾವರಿ ಬೇಲಿಯ ಹೂಗಳು,  ಈಗ ಅವನ ಕಣ್ಣಲಿದ್ದ ನೋವೆಲ್ಲವನ್ನ ಬಚ್ಚಿಟ್ಟುಕೊಂಡಂತೆ ಕಾಣುತ್ತಿದ್ದವು.

ನಂತರದ ಅವನ ರಿಸಲ್ಟ್ಸ್  ನಂಗೆ ತಿಳಿಯಲಿಲ್ಲ. ತಿಳಿದುಕೊಳ್ಳುವ ಪ್ರಯತ್ನವನ್ನೂ ಮಾಡಲಿಲ್ಲ.
ಅವನ ಮನೆಯ  ಫೋನ್ ನಂಬರ್ ಹುಡುಕುವುದು ಕಷ್ಟವಲ್ಲ, ಆದರೆ ಯಾವ ಸಂಬಧದ ಎಳೆ ಹಿಡಿಯುವುದು ?
ವರ್ಷಕ್ಕೊ , ಆರು ತಿಂಗಳಿಗೋ ನಡೆವ ಮೂರ್ನಾಲ್ಕು ನಿಮಿಷಗಳ ಭೇಟಿಗೆ ಯಾವ ಹೆಸರನಿಡುವುದು?
ತನ್ನ ಸೋಲನ್ನ ಅವ ನನ್ನೊಂದಿಗೆ ಹಂಚಿಕೊಂಡಿದ್ದಾನೆ ಅಂದರೆ  ಕನಿಷ್ಠ ಫ್ರೆಂಡ್ ಅಂತನಾದ್ರೂ ಅಂದ್ಕೊಂಡಿರ್ಬೇಕು
ಅಂತ  ಒಮ್ಮೆ ಅನಿಸಿದರೆ ಮತ್ತೊಮ್ಮೆ ಇಲ್ಲೆಲ್ಲೋ ಹೋಗುತ್ತಿದವ ಬಂದ, ತಿಳಿದದ್ದು ಮಾತಾಡಿದ ಹೋದ , ಸೋತೆ ಅಂತ  ಹೇಳಿ ಹೊರಟೆ ಹೋದನಲ್ಲ ಸಂಬಧವಿದ್ದಿದ್ದರೆ  ಹಾಗೆ ಹೋಗುತ್ತಿದ್ದನೇ ? ಅಂತ ಪೂರ್ತಿ ವಿರುಧ್ಧ ದಿಕ್ಕಿನಲ್ಲಿ ಮನಸು ಓಡುತ್ತಿತ್ತು.
ಕನಸೊಂದು  ಈಡೇರದೆಂಬ ಸತ್ಯ ಬುಧ್ಧಿಗಿಂತಲೂ ಮೊದಲು  ಮನಸ್ಸಿಗೆ ತಿಳಿಯುತ್ತದೆ.
ಜೊತೆಗೇ ಬೆಳೆದ ಅವನು ಕನಸೇ?

ಕೆಲವೊಮ್ಮೆ  ಮನಸು  ಅತ್ತ ಸ್ನೇಹವಲ್ಲದ   ಇತ್ತ  ಪ್ರೇಮವಲ್ಲದ  ಒಂದು ನಡುವಿನ ಸಂಬಂಧವನ್ನ ಹುಡುಕುತಿರುತ್ತೆ .
ಹುಡುಗರಿಗೆ  ತಾಯಿ, ಅಕ್ಕ -ತಂಗಿ , ಗೆಳತಿ  ಎಲ್ಲವೂ ಆಗಬಲ್ಲ ಒಂದು ಬಂಧ ಆಪ್ತವಾಗತ್ತೆ.
ಅಂಥ ಒಂದು ಬಂಧವನ್ನ ಅವ ಅರಸಿದ್ದನೆ ?

ಪದವಿಗೆ ಬರುವ ಹೊತ್ತಿಗೆ  ಒಬ್ಬ ಸಂಗಾತಿ ಇರುವುದು ಅಪರೂಪವಲ್ಲದಿದ್ದರೂ ಸಾಮಾನ್ಯವೂ ಆಗಿರದ ಕಾಲವದು.  ಗೆಳತಿಯರು ಅವರ ಬಾಯ್ ಫ್ರೆಂಡ್ಗಳ ಬಗ್ಗೆ ಹೇಳಿದ್ದು ಕೇಳಿದಾಗ ನನಗೆ ಇವನ ನೆನಪಾಗುತ್ತಿರಲಿಲ್ಲ.
ಹಾಗಾದರೆ,  ಹೆಣ್ಣಾದ ನಾನು ಹುಡುಕಿದ್ದು ಏನನ್ನು ? ಯಾವ ಹೆಸರಲ್ಲವನ ಕೂಗಲಿ?
ದಂಡಿಸಿ ಯಶೋಧೆಯಾಗಲಾರೆ , ಸಾಧಿಸಿ ಭಾಮೆಯಾಗಲಾರೆ .
ಮೀರಾ, ರಾಧೆಯರು ಕಥೆಯಲ್ಲಿ ಮಾತ್ರ ಚೆನ್ನ.

"ಯಶೋದನು ಕಾನುರ ನಿನ್ನು  ದಂಡಿಂಚ
ಸತ್ಯನು  ಕಾನುರ  ನಿನ್ನು ಸಾದಿಂಚ
ಎವರು ನುವ್ವನಿ ನನ್ನು ಅಡಗಕು "