ದಾಸವಾಣಿ - ೧

ಎಷ್ಟು ತಪವನು ಮಾಡಿ ಪಡೆದೆನೋ ನಾ ನಿನ್ನ
ಕಷ್ಟವಾಗಿದೆ ನಿಂದೆ ನುಡಿಯ ಕೇಳುವುದು||ಪ||
ಚೇಷ್ಟೆಯನು ಮಾಡದಿರೋ ಕೃಷ್ಣ ಈ ಪರಿ ಬಹಳ||
ನಿಷ್ಠೂರ ವಚನಗಳ ಆಡುವರು ಜನರು||ಅ.ಪ||

ಕೊಂಡು ಪೋಗಲಿ ಬೆಣ್ಣೆ ಪಾಲು ದಧಿ ಭಾಂಡಗಳ|
ದುಂಡು ನಗು ಮೊಗ ಚೆಲುವ ನಿನ್ನ ಮಗನು|
ಕಂಡರೆಮ್ಮನು ಮೋರೆ ತಿರುವಲೇತಕೆ ಇಂಥಾ|
ಪುಂಡು ಹುಡುಗನೆ ನಿನ್ನ ಮಗನೆಂದು ಜರಿಯುವರು||೧||

ಮುರಳಿ ನಾದವ ಕೇಳಿ ಮರೆತು ಮೇವನು ಎಮ್ಮ
ತುರು ಕರುಗಳೆಲ್ಲ ಬಲು ಕೃಶವಾದುವಮ್ಮ
ಹರಿವ ಯಮುನಾ ಜಲದೋಳ್ ಆದ ಅವಿವೇಕವನು
ಅರುಹಲೆಮ್ಮಯ ಮನವು ಜರಿವುದೆಂದಾಡುವರು||೨||

ಸಂಸಾರ ಮೋಹವನು ಮರೆತು ಎನ್ನಲಿ ಮನದಾ*
ಸಂಶಯವ ಬಿಡಿ ಬಿಡಿರಿ ಪ್ರಸನ್ನರಾಗಿರಿ ಎಂದ
ಧ್ವಂಸವಾಯಿತು ನಮ್ಮ ಅಭಿಮಾನ ಇವ ಚಂದ್ರ
ವಂಶಕೆಂತಪ ಕೀರ್ತಿ ತಂದನೆಂದಾಡುವರು||೩||