ಮೂಕಂ ಕರೋತಿ ವಾಚಾಲಂ

ಲಹರಿ  :
ಯಾರದೋ (ಅದೂ ಒಬ್ಬ ರಾಕ್ಷಸನ ) ಮನೆಯಲ್ಲಿ ಅದೆಷ್ಟೋ ಕಾಲವಿದ್ದ ಹೆಂಗಸರಿಗೆ
ಆಶ್ರಯವಿತ್ತವನು ವಿಶ್ವಹಸ್ತನೇ ಆಗಿರಬೇಕು
ಎಲ್ಲೋ ಕುಳಿತು ದ್ರೌಪದಿಗಾದ ಅವಮಾನವ ಕಂಡು ಮಾನ ಉಳಿಸಿದವನು
ವಿಶ್ವ ಬಾಹುವೇ ಆಗಿರ ಬೇಕು

..............................................
ಮಗುವಿಲ್ಲದ ತಾಯಿಗೆ
ಇಲ್ಲದ ತೊಟ್ಟಿಲ, ಲಾಲಿಯ ಕೇಳಬಲ್ಲ.
ಎಲ್ಲ ತಾಯಂದಿರ ಮಗುವಾಗಬಲ್ಲ

ಇನಿಯ ನಿಲ್ಲದ ಗೋಪಿಕೆಗೆ
ಇಲ್ಲದ ಕನಸುಗಳಿಗೆ, ರಂಗ ತುಂಬಬಲ್ಲ
ಎಲ್ಲ ಹೆಣ್ಮನಗಳ ಸಖನಾಗಬಲ್ಲ

ಬಾಗಿದ ಬೆನ್ನ ಕುಬ್ಜೆಗೆ
ಇಲ್ಲದ ಗಂಧದ, ಪರಿಮಳವ ಸವಿಯಬಲ್ಲ
ಎಲ್ಲ ರೋಗ ಪರಿಹರಿಪ ವೈದ್ಯನಾಗಬಲ್ಲ

ಬಡತನವೇ ತಾನಾದ ಸುಧಾಮನಿಗೆ
ಇಲ್ಲದ ನೇಹದ, ಸವಿಯ ಉಣಿಸಬಲ್ಲ
ಎಲ್ಲ ಕೊರತೆಗಳ ನೀಗಬಲ್ಲ

ಅನಾಥರಾಗಿ ನಿಂತ ಸಾವಿರ ಸಾವಿರ ಮಾನಿನಿಯರಿಗೆ
ಇಲ್ಲದ ಆಸರೆಯ, ವಿಶ್ವಹಸ್ತದ  ಆಸರೆ ನೀಡಬಲ್ಲ
ಎಲ್ಲ ಪರಿತ್ಯಕ್ತೆಯರ ಆಸರೆಯಾಗಬಲ್ಲ

ರಣರಂಗದಲ್ಲಿ ಅಧೀರನಾದ ಪಾರ್ಥನಿಗೆ
ಇಲ್ಲದ ಧರ್ಮಚಕ್ಶುವಿಗೆ, ದೃಷ್ಟಿ ನೀಡಬಲ್ಲ
ಎಲ್ಲ ವಿಜಯರ ಸಾರಥಿಯಾಗಬಲ್ಲ

ಅವನೆಲ್ಲವಾಗಲು ನಾ ನನ್ನ ಮರೆತು ಅವನ ಕೂಗಬೇಕಲ್ಲ !