ಹಳ್ಳ ಸೇರದ ಹನಿಗಳು....ಭಾವಬನಿಗಳು

 ಭಾವಬನಿಗಳು ಎಂಬ ಹೆಸರನ್ನ ಹಿರಿಯರಾದ ಸುನಾಥ್ ಸರ್ ಸೂಚಿಸಿದ್ದು.
ಹೊಸ ಪದ ಮತ್ತು it seems to be more apt,  ಅದಕ್ಕೆ ಆ ಶೀರ್ಷಿಕೆಯನ್ನೂ ಕೊಟ್ಟೆ.
 ೧. ದಾರಿ ಅದೇ,
ಕೈಗಳೂ ಎರಡಿವೆ,
ಅಂದು ನಿನದೊಂದು ನನದೊಂದು
ಬೆಸೆದಿತ್ತು ಬಂಧದಲಿ ,
ಇಂದು ನನದೆರಡು ಕೂಡಿವೆ
ಪ್ರಾರ್ಥನೆಯಲಿ

೨. ಮುಗಿಲಿನ ತುಂಬೆಲ್ಲಾ ಅವನದೇ ಬಿಂಬ
ಇವತ್ತು ಅಮಾವಾಸ್ಯೆ, ನನಗೇಕೋ ನಂಬಿಕೆ ಬಾರದು
ಕಂಬನಿ ಹರಿಸಿ ನೆನಪ  ಹೊರ ಕಳಿಸೋಣವೆಂದರೆ
ಹಾಳಾದ್ದು, ಕಂಬನಿಯಲ್ಲೂ ಅವನದೇ ಬಿಂಬ !

೩ ಮಗು ಹೊರ ಬಂತೆಂಬ ಕೂಗು ಕೇಳಿ
ಮಲಗಿದ ತಾಯಿಯ ಕಣ್ಣಲ್ಲೆರಡು   ಹನಿ,
ಒಂದು ತನ್ನ ಬಿಂಬ ಕಂಡದ್ದಕ್ಕಾಗಿ
ಮತ್ತೊಂದು ಅದು ಒಡಲಿಂದ ದೂರಾದ್ದಕ್ಕಾಗಿ

೪.  ಮದುವೆ  ಮುಗಿಸಿದ ಬೀಗತಿಯರಿಬ್ಬರ ಕಣ್ಣು ಜಿನುಗುತ್ತಿದೆ
    ಮಗಳ ತಾಯಿಗೆ ಮಗಳು ದೂರಾಗುವ  ದುಃಖ
 ವರನ  ತಾಯಿಗೆ,  'ಸೊಸೆ'ಯ  ಭಾರದ ದುಃಖ

೫. ಬಟ್ಟ ಬಯಲಲಿ,
ಕಡಿದ ಮರದಲಿ,
ಒಂಟಿ ಹಕ್ಕಿಯ ಮೌನ ತೂಗುತಿತ್ತು
ಮುರಿದ ಬಂದದಲಿ
ಹರಿದ ಭಾವಗಳಲಿ 
ನನ್ನ 'ಇಂದು' ಮುಗಿಯುತ್ತಿತ್ತು

೬. ನನ್ನ ಕಥೆ ಬರೆಯೋಣವೆಂದು ಕೂತೆ
ಒಂದು ಹಾಳೆ ದೊಡ್ದದೆನಿಸಿ, ಮಡಚಿ ಸಣ್ಣದಾಗಿಸುತೆ
ನಡೆದೆ, ಮಡಚಿ ಮಡಚಿ ಕೊನೆಗೆ ಉಳಿದದ್ದು ಒಂದು ಬಿಂದು
ನಾನು ನೀನು ಅದರಲ್ಲಿ ಒಂದು